Dow, Morel ak Regan te dirije yon ekip 14 moun ki soti Etazini ak Repiblik Dominikenn.  Ekip la te òganize yon gwo podiyum avèk ekleraj pou konsè 22 jiyè sou Plas Katedral la epi yo te filme l avèk twa kamera HD. Yo te anrejistre konsè a sou aparey dijital 24 “trak” yo pote pou itilizasyon ni nan fim nan, ni nan yon CD yo swete fè soti nan menm moman avèk fim nan. Ekip la te filme ak anrejistre 23 ak 24 jiyè nan Plen di Nò, tou. Epi yo te travay avèk plizyè nan mizisyèn yo lakay yo, nan Klib Fe Vè, epi nan divès kote Okap.

  Objektif pwojè a se prezève epi fè lemond antye konnen plis sou mizik, lakilti avèk listwa pèp peyi d Ayiti atrave listwa Septentrional, okès ki pi ansyen nan peyi a. Li gen 58 lane deja, ki vle di, li gen tan depase laj mwayen lanmò moun nan peyi a, ki se 52 lane! Nan yon peyi kote koudeta, siklonn, goumen ant Ayisyen epi enjerans etranje ap bafwe ak detwui tout bagay, okès sa a toujou la. Poukisa? Morel avèk Regan t ap travay sou pwojè a depi 2002. Lane denyè yo envite Dow jwenn avè yo. Yo konte tounen nan Septanm oswa Oktòb.

  Ekip pwodiksyon an ap travay pou fè SEPTENTRIONAL: FROM THE NORTH pase toupatou sou latè. Yo deja nan diskisyon avèk chenn televizyon ameriken “PBS” (televizyon edikasyonèl ameriken), kanadyen, franse, almay, finland avèk laswèd. Y ap travay pou fè yon CD ak liv k ap komèmore 60tyèm anivèse a sòti, tou. Dokimantè sa a gen apwui òganizasyon ameriken ITVS, ansanm avèk Hotel Mont Joli epi Lynx Air an Ayiti.

  Pou plis enfòmasyon, rele Daniel Morel oswa Jane Regan Ozetazini: 001-917-412-5734 oswa ekri yo: dmorel@wozoproductions.org, jregan@wozoproductions.org.                             Nou envite ou itlize foto sa a gratis.